Zerrspiegel [ Search ] [ Index ] [ Edit ] [ About ]

تأثرات ١٨٧٣ نجی م ، ١٢٩٠ ه. ده خاره زيم نی روسلار استيلا سيدان سونکرا ملا شيدايی نينک تأثراتی

Description

(ИВАН РУЗ-3, № 258, 1А-7A)

شيدايی

Categories

Восточные слова Грабеж Ислам Ишан Конфессиональные группы Коран Мусульманин Мухаммад Мурад Диванбиги Пахлаван Махмуд Религия Русский Святой Таджик Узбек Хан Хива Хорезм Чихил Тан Этнические и племенные группы باج شهيد غازي قيليچ ناموس کرامت

Editor

Text

١٨٧٣ نجی م ، ١٢٩٠ ه. ده خاره زيم نی روسلار استيلا سيدان سونکرا ملا شيدايی نينک تأثراتی

١٢٩٠ ييلی اوروس کيليب شهر خيو نی الغان حالدا بر آمی

شاعرنی آيتغان ورساقيلاری

خانلارينک عادلُ قوتلوغ زمانده

بير نيچه وقت آبادان بولدينک خوارزم

وصفينکنی ياد ايتکان خدا قرآنده

تعجب يورت بولوب بولدينک خوارزم

بهارينکدا سيراب باغده بلبل لار

کلشنده آچليب قيرميزی کل لار

فصل خزان اوروب سوسن سنبل لار

آچيلغان کل ايدينک سولدينک خوارزم

خراب بولدی سنينک کوشکی ايوانينک

ييقيلدی سايه لی اولوغ نروانينک

قاچيب ياشورونديلار توره خانينک

ارکان ِ دولتدين بوش قالدينک خوارزم

سنينک کبی شهرهيچ يرده بولمس

اوتکان کون آيلانيب اوزينه کيلمس

حق دين اميد ايتکان نا اميد قالماس

ايمدی بولغای خدا يارينک خوارزم

محمد مراد ديوان بيکينک قل بولدی

مدعاسی يورت بولمدی فول بولدی

يورت قولدين کيتماککا سبب شول بولدی

ايچده قالدی آرزو ارمانينک خوارزم

نعمتينک فراوان عزت لی ايردی

زمانلارينک تويلیُ عشرتلی ايردی

شهرينک فراغتُ خانينک دولتلی ايردی

برچه سينی برهم ايلادينک خوارزم

عدالتلی خانلار دنيادين اوتدی

مسلمان اهلينه حکمين يوروتدی

قايو قيزيل باشغا اختيار يتدی

موندين سونک شوکتينک بولمدی خوارزم (­a1/¯b1)

خراب بولدی کوشک ايوان تختُ تاج

خدا تقدير ايتسه آنکا يوق علاج

کيتی شونچه سالغوت زکواة برله باج

تيريک ايدينک ايمدی اولدينک خوارزم

کافر کيليب سنينک شهرينکنی آلدی

مسلمان اهلينه قوزغالان سالدی

دينينک نی آلورغه آيمدی نی قالدی

قرادی کافرغه کونلارينک خوارزم

هر کز خسته بولمس سوينکغا توشکان

باغلارينکنی تازه ميوه سی پشکان

بار ايدی ايشانلار حق غه يتوشکان

خوار اولدی عالِمُ ايشانينک خوارزم

اقبالينکا بر قيزيل باش قل چيقدی

مثالی يوق ايلکا ايکری اول چيقدی

يلدا اوچتورت يوله سالغوت فول چيقدی

مدعاسی بولدی فول قولينک خوارزم

کول لارينک بار ايردی اورداکلی قازلی

قيز و جوانلارينک شاه صنم نازلی

آق يوزلی پرده لی بلبل آوازلی

بهشت دين آيريلدی حورلارينک خوارزم

ويران بولدی سنينک شان شوکتينک

شونچه دستکاه برله اغير دولتينک

خلص کلام باشدين کيتی زينتينک

تبرانمادی پهلاوان پرلارينک خوارزم

عدالتلی خانينک تختی دين توشدی

ديوان بيکينک قاچيب يورت به يورت آشدی

دولت قوشی ايمدی باشينکدين اوچدی

بو زولدی آبادان کنت لارينک خوارزم

قنی جنت کبی باغ بوستانلار

قنی شکار ايتکان بيک توره خانلار

کرامتلار کورساتمادی ايشانلار

بو کوندا بارسين کُم قيلدينک خوارزم (­b1/¯a2)

شکار ايلاب تاغ ُ دره نی توتغان

هيبتی بولوتديک تاغلارنی باسغان

کيک قولان اولاب قوشلارنی سالغان

بارين صاحب ارمان ايلادينک خوارزم

سونکی خوشليق بولور داغ هجرانينک

قضا يتمای چيقماس هيچکيمينی جانی

ميراث تختی کيتب حضرت خان نی

بيزار ايلاب يورتدين قاچوردينک خوارزم

بساطينکدا باری آزو کوب کيتی

ديوان بيکينک اوی ايلدين کيچوب کيتی

ندرشاه دين قالغان اولوغ توب کيتی

ينه شونچه سيم ُ زرلارينک خوارزم

قيش ساوقين ياز هواسين کورمکان

يوز قدم يول پياده هيچ يورمکان

خدادين غيريغه خدمت قيلمغان

بنده بولوب توره بيک لارينک خوارزم

بيک لار بنده بولوب چوری لار آزاد

دوست لار غمکين بولوب دشمن ايرور شاد

شوم فلک ايلکی دين داد ايله فرياد

کيتی قولدين اسلام دينينک خوارزم

صونه لار آيريلدی چالقار کول لاردين

باغبانلار آيريلدی باغ کل لاردين

آيريلدينک توز مولتوق آغير لشکردين

عجب کونلار توشدی باشينکا خوارزم

کج آيلانيب شوم فلک نی کردشی

راست اولمادی مؤمنلار نی هيچ ايشی

ازل کونده يازيلغان دور بو ايشی

قضاغه آخر راضی بولدينک خوارزم

الله نی تقديری سبب اوروسدور

شکوه قيلغان حقدين غافل اولوسدور

سلطنت ليغ شاهغه عارُ ناموسدور

ييغلاب قالدی توره بيک لارينک خوارزم (­a2/¯b2)

فسق فساد يورت نی باسدی بيعدد

ظالم لار ظلمينی ايلادی بيحد

بعد از ان قوتينک حق ايلادی رد

عکسينه توزولدی کارلارينک خوارزم

نيچه وقت دشمندين ايردينک سلامت

قايغو برله غم غصّه دين فراغت

خداغه تاپشوردينک اوزنی امانت

پرلارينک اولغای مددکارينک خوارزم

دوستلار عجب زمان بولدی بو زمان

خدا بولغای قل لاريغه مهربان

محمد امّتی اهلی مسلمان

آچينکلار دعاغه قوللارينک خوارزم

انشاء الله قايتب کيلور دولتينک

زياد اولور کونکون عيش وعشرتينک

باشينکدين هم کيتار قايغو کلفتينک

کورارسن اوّلغی کونلارينک خوارزم

آندين سونک بولورسن کونبکون آباد

مؤمن دعا قيلسه قالمس نامراد

يورت آباد ليغ بولوب دولتينک زياد

توزولکای شوکتينک شانلارينک خوارزم

پشيب باغلارينکدا هر تورلو ميوه

کل لاريده ايلاب بلبل لار شيوه

اهلی اسلام ايلی بيچاره بيوه

تا روز شب دعا کويلارينک خوارزم

بزرکان باطر عسکردين آيريلدينک

مثلی صد فداغی دُردين آيريلدينک

سانسيز مالُ متاع زردين آيريلدينک

اوزُلوب ترقادی نرلارينک خوارزم

تومن اوزبک بيله تاجيک اولادينک

قرقمينک اويلی تيکه يموت ايلادينک

کافرغه باقيب کيلمای اويالدينک

سونکره آزدی سنينک فعل لارينک خوارزم (­b2/¯a3)

قيلغان فعل لارينکدين توبه غه کيلکيل

بولغان حادثه نی فکرينی قيلغيل

باطن يولدين قايتغيل راست نی کوزلاکيل

آچيلغای کل کبی يوزلارينک خوارزم

اوليالار کرامت دين آداشتی

حرام شبهه کوندين کونکا اولاشتی

عزيز باشدين اولوغ دولتينک اوچتی

تنينک قاليب کيتی جانلارينک خوارزم

يورت ايکاسی عادل خاندين آيريلدينک

خِرکاه بارکاه شوکت شاءندين آيريلدينک

ايلدين يورتدين دنيا مالدين آيريلدينک

کيتی نيجه حولينک يرلارينک خوارزم

طاوسلار کيتی لار جلوه لی نازلی

نازنين لار قنی بلبل آوازلی

قنی کوينده لار نغمه لی سازلی

بو شه قالدی همه ايل لارينک خوارزم

نان بردينک مداما آچ آريقغه

غريب مسکين مسافر بار و يوقغه

کيتدينک غيری دينُ تيلی بوزوقغه

بساطينکدا هرنه بارلارينک خوارزم

نی عجب يورت ايدينک همه کا برديک

ميوه لارينک ايدی بی بها دُرديک

زنان مردانلارينک غلمان حورديک

خزان اوردی باغ ُ کل لارينک خوارزم

دوستلار عجب زمان زمانه بولدی

منافق اهلينه بهانه بولدی

ايمدی توزالماکی کمانه بولدی

باغلاندی چار طرف يوللارينک خوارزم

کل لارگه يتوشدی بی محل خزان

بوغدايلار پشمايين بولديلار سامان

غرض کوب فساده آيلاندی زمان

باطن بولدی شونچه شوکتينک حوارزم (­a3/¯b3)

اوقاتينک نه اوتار نه کونينک کچيب

دولت قوشی کيتی باشينکدين اوچوب

سوزلاشيب کافرنينک سوزينه توشوب

آغزينکدين چيقماسدور سوزلارينک خوارزم

کلمه کوی مؤمن قل نينک ناله سی

خدا دين باشقه يوق پشتُ پناسی

تونکوز يولبارص بولدی يورت نی آغاسی

سبيل قالدی اسلام ايل لارينک خوارزم

مسجد مدرسه لار قولونکدين کيتی

اختيار عنانينک کافرغه يتدی

مسلمان کافرنينک خذمتين ايتدی

قالمادی هيچ ناموس عارلارينک خوارزم

کل لارينک ايسلی دور سوينک سَمک لی

صحرالارينک خوشبوی کانينک نمک لی

يول لارينک خيابان نروان تيراکلی

برهم اوردی مرغذارلارينک خوارزم

روشن قوياش کيريب قرا بولوت غه

راحت بَدَل لانيب قيغو محنت غه

کافر نی آيلادی مسلط يورت غه

خدايم ايشيتکای دادلارينک خوارزم

اميدينک اوزماکيل فضل خدادين

تيلينکنی آيرمه ذکر ثنادين

اوّل آخير اميد ايلاب خدادين

کوتارکيل دعاغه قول لارينک خوارزم

عجب ايرماس حق قوتارسه باشينکنی

قبول ايتسه کوزدين آقغان ياشينکنی

آوّلدين تا آخير بارچه ايشينکنی

اوزينی فضليغه سال مدام خوارزم

حاجتينک نی تاپشور حق نی اوزی غه

آلدانمه کيرمه کيل شيطان سوزيغه

قرا بولسون دشمنلارينک يوزيغه

محشر کوندا آلغيل دادلارينک خوارزم (­b3/¯a4)

تورغايسن برقرار دينينکدين آزمای

امرين ترک ايلايوب خداغه يازمای

شرعين توتوب مصطفی دين قول اوزمای

غيری ايشنی ايتمانک ای اهل خوارزم

بو کافرده آصلا سان ُ عدد يوق

تبرنورگه سنينک يورتينکدا حد يوق

خدادين غيريدين سنکا مدد يوق

سيناب کورکيل ايمدی اقبالينک خوارزم

اوّل حاکملاردين عدالت کيتی

مؤمن لاردين انصاف و ديانت کيتی

ايشانلاردين خالص عبادت کيتی

بارچه سينی اوزينکدين کورکيل خوارزم

باطل بولدی شونداغ قَولی شريعت

بيلمان قچان يتار آيلانيب نوبت

بو کوننی اوزينکا بيليب غنيمت

کوندا يوزمينک شکر ايلاکيل خوارزم

يورتدا قالدی ارمان بر بولمای سواش

سبب بولوب ديوان بيکی قيزيل باش

مسلمانغه کافر بولماس قرينداش

باشقه دور مذهبينک هم دينينک خوارزم

دينينک روشن راقدور شمسُ قمردين

کيا لارينک خوشبوی مشک عنبردين

قيز جوان خوشروی حور جنت دين

حق يادينی دايم ايلاکيل خوارزم

نه بر ايام ايدينک نه بر زمانه

مروّت بابينده يخشی يمانه

توکل ايلاکيل کيتمه کمانه

اولماسانک آيلانور کونلارينک خوارزم

قرقمينک غازی يتميش ايکی شهيدلار

مسلمان يورتينده ياتغان شهيدلار

شاهُ کدا بارچه خواجه سيدلار

دعالاری باردور کون بکون خوارزم (­a4/¯b4)

حق يار بولسه يورت آچيلور بيکمان

بولوتدين کون يوزی بولوب نمايان

قرانکغوده آداشغانلار بزرکان

ضرر يوقتور تاپسه يوللارين خوارزم

فعل بددين اکر توبه غه کيلسانک

بولغان ايشنی اکر يادينکا سالسانک

تا اولکونچه حق نی قوللوقين قيلسانک

مراده يتارسن آخيرده خوارزم

خطغه يازيب ادا اولماس سوزلارينک

تا اولکونچه چيقماس يوراکدين داغينک

يادينکدا ساقلاغيل سوزين ازبرينک

کوزلاکيل ايرته راق يوللارينک خوارزم

سن باغ ايدينک بلبل اوچوب زاغ آلدی

حقنی تقديريدور بوياغی آلدی

کوکراکينک کا دردُ الم داغ سالدی

سودا ايشلارينک زيانه دوندی خوارزم

بر کل ايدينک غنچه لارينک آچيلمای

ميوه لارينک چهار طرف ساچيلمای

مدعا باريچه شربت ايچيلمای

ايرته راقدين خزان يتوشدی خوارزم

شوم فلک کردشی شوکتينک بوزدی

آشناليق طنابين قولونکدين اوزدی

کون اوتمايين بيوفاليق کورکوزدی

عکسينه آيلاندی زمانينک خوارزم

سيغناغان تيرکانينک بارچه سی کتی

غيری دين کافرغه نصيبه ايتدی

خدا تقديری دور دورانلار اوتدی

چاره نه شول بولسه فرمانی خوارزم

باغلارينک غه فصل خزان يتوشوب

زاغلار قاليب بلبل لاری اوچوشوب

اول يتی اقليمه آوازنک توشوب

پراکنده بولدينک آخيرينک خوارزم (­b4/¯a5)

سنی آزدوربدور فلک يولينکدين

بلبلينک آيريلدی قيرميزی کلدين

آغزی آله ليقدين يورت کتی قولدين

آباد ايل لار بولدی ويرانه خوارزم

زمانه زمانه عجب آيلانيب

يمان قالدی يخشيلاردين سايلانيب

بيدولار اورنيغه خرلار بايلانيب

بولدی کار بارينک تلان خوارزم

انشاء الله بَدْ دين تاپارميز نجات

آندين سونک بولورسن قايته دين آباد

يورت آبادليق بولوب دولتينک زياد

توزالور تيز شأن شوکتينک خوارزم

نيچه عادل خوانلار يورت سوراب اوتدی

يورتين امان سقلاب آبرويلی کيتی

قايسی وقت کافرغه اختيار يتدی

قالمادی حاضردا اختيارينک خوارزم

ظالملار مظلومنينک حقينی ييدی

يالغاندين اوزلاری مؤمن من ديدی

يمانلار آحرت جزاسن بردی

توتدی اوزينکنی اوز توزلارينک خوارزم

روشن قوياش کيردی قرا بولوتغه

راحتلار آيلاندی قرا محنت غه

اوز فعلينکدين کافر کيلدی بو يورتغه

طالعينک شوم ليغی بيليندی خوارزم

بو ايشلار اوزنکدين قيلماغيل کيله

خدا تقديرينه بولورمو حيله

نه سوز آفت يتسه کافر ايلينه

غير سوزينک باری يالغاندور خوارزم

نيعجب صفالی بوستانلی جايلار

مسجد و مدرسه کوشک سرايلار

کوموش حل بريلکان قيليچ مولتوقلار

غيردينغه نصيب ايلادينک خوارزم (­a5/¯b5)

سحرلار توروبان طهارت ايلا

هرنه برکانيکا قناعت ايلا

قل ايرسانک خواجه نکا اطاعت ايلا

کونکلونکا کيلتورمه بدکمان خوارزم

دعالارينک قبول ايتکای خداينک

الله غه يغلاسانک اوتکای کناهينک

شايد سفيد اولغای رويی سياهينک

يتوشسه اوزينکا دورانلار خوارزم

نيعجب يتوشسه بيگلارگه دوران

تبرانيب جايی دين حضرت پهلاوان

الله هم قيچقورسه اهلی مسلمان

تاغ تاشغه بريب فرمان خوارزم

وليلار قوزغاليب فيرلار يار بولسه

چيل تَن لار غايب دين مددکار بولسه

تبرانور وقت بولدی جانينک بار بولسه

تنده جانينک بيش کون مهماندور خوارزم

قسمت شونداغ بيش کون امان اولماسانک

شک سيز ادا شورسن يولدين يورماسانک

ينه بر کون قايتب آباد بولماسانک

کوب قالور ارمانينک ايچينکدا خوارزم

ميوه لارينک لذيذ بالدين شکردين

سولارينک شيريندور آب کوثردين

کيالارينک حوشبوی مشک عنبردين

جنت کبی ايرور باغلارينک خوارزم

نه چاره تارتيلسه قدرت قلم لار

کونکلينکدين چيقماس بو داغ الملار

الله دين بولماسه لطف کرملار

تيز بنيادينک خراب ايلادينک خواررزم

سنه مينک ايکی يوز توقسانغه يتدی

دولت باقدی باشينک آسمانغه يتدی

نوبت کچ آيلانيب دوشمنغه يتدی

خالی قالدی کوشک ايوانينک خوارزم (­b5/¯b6)

شوم رقيب لار بوزدی سنينک شأنينکنی

اوتغه ياقدی کوهر برله کانينک نی

فلک شطرنج اويناب اوتدی بارينکنی

بولدی ويران ايوان کيوانينک خوارزم

تمت