Zerrspiegel [ Search ] [ Index ] [ Edit ] [ About ]

Письмо ‘Аваз (‘Иваз)-Мухаммад Мирза Н.П. Остороумову (от 27 октября 1886 г.)

Description

‘Аваз (‘Иваз)-Мухаммад Мирза сын Умид-мархума,

27 октября 1886 года

Categories

Администрация Аксакал Волость Выборы Географические названия Казах Квитанция Налоги Политика Русские слова Сарт Старшина Туркестан Уезд Уездный начальник Этнические и племенные группы اوی پولی ايليک باشی ير پولی

Editor

Б.Б.

Text

الخط نصف الملاقات

عزتلو و اولوغ حرمتلو نيكالاى پيتروويچ نينگ جناب عالىلارينه عرض بنده ليگيمز. بزنينگ تركستان اويازى نينگ بر نيچه صارتيه و قزاقيه غريب و فقيرلارى نينگ اوى پولى يعنى هر يلغى يتوشلى هر تورلوك آليم آقچهلار توغروسينده اوزلارى نينگ عمل دارلارى يعنى ولوسناى واييستارچين و آريغ آقساقال و ايليكباشىلارى نينگ ناانصاف ليقلاريدين كورگان جبرلارى سببلى يغلاغانلارين كوروب آدم فرزندلارى نينگ حاللارى ينه رحِم و شفقتميزنينگ قوّتى برلان توبنده برنچى رقم تارتوب سيز اولوغ حرمتلونينگ حضور عالينگزدان اوميد توتاميزكم ممكين بولسه اوز طرفينگزدان از براى فقير فقرالار اوچون بر تردّد قيلارموكين سيز ديب وموكين سيز كرامى نينگ اوز كوزينگز بول فقيرلارنينگ حاللارين كورسه لار ايدى‘ البتّه سيزنينگ رحمينگز بز كمينه دين هم زيادراق كيلار ايردى. چونكم هر كمده علم و عقل كوبراق بولسه البتّه رحم و عدل كوبراق بولسه كراك و هم بارچه دين ده و آدم گرچيليك علامتى هم رحم و عدل دور. يعنى مثلا ً هر يلغى يتوشلى هر تورلوك آليم اقچه لارنى يغماقغه هر تورلوك عمل دارلارغه هر قايو اويازناى حاكيم لاردان چيقغان فرمايش كاغزلارده يازولادور. كم هر ولوس و آقسقال لارنينگ‘ ايل ليك باشىلارى بر يرگا جمع بولوب اوز ولوس و شهر و قيشلاقلارى نينگ هر قايولارى نينگ مال و ملك و كوچه قوتلارينه لايق قيليب اوى پولى و ير پولى لارين تقسيم قيلسونلار ديب. بس بول فرمايش تابول و ختگاچه بزنينگ تركستان اويازى بلكم غيرى بر نيچه اويازلارده هم جارى بلغان ايماس چونكم البتّه هر قايو آريغ آقسقال و ايليك باشىلار البتّه اصلينده اكثرلارى علم سيز آدملاردان بولادور. بول سببلى اول علم سيزلار عدل و شفقت دين بى خبرراق بولوب فقير و غنىلارگا برار اوى پولى و ير صاليقلارين تقسيم قيلادورلار و هم هر يلغه يتوشلى آلم اقچه لارنى يغناغوچى هر طايفه نينگ عملدارى برلان فقرالارى آرالارينده فقرالار كوب بروب ايردوم. امّا منگا بيرگان كفيتانسينده آز يازوب دور ديب و عملدارلار ايتادوركم منگاهر قانچه بيزگانين يازديم كفيتانسيدين آرتوق آقچه آلغانيم يوق ديب. بس انداغ بولسه هر كيم نينگ على قدر حاللارينه آليم اقچه سالماقچى بولغانده ممكين و معقول بولسه توبانده يازيلغان مضمون ده ترتيب بولسه اِحتمالدوركم خلايقلارنينگ فقير و مسكين لارى آسايشته بولسه لار مثلا ً خدا خواه لاسه بر آى ايكى آى دين كيين ينگى نظام قانونينه موافق سايلاو بولوب هم ينگى نظام نينگ قانونلارى جارى بولسه كراك. بس شول سايلاوده هر اويازناى حاكيملارغه اوز تصرّف لارينداغى برچه فقرالارى نينگ اسملارين و هم هر قايولارى نينگ خاتون و فرزندلارى نينگ عددلارين بيليب انگا مناسيب ايش توتماق لارينى دفتر قيليب يازوب آلماق لارينه بس مذكور دفتارگا برآز محنت آرتوروب يعنى هر قايو اوى ايگالارى نينگ آدملارى نينگ عددلارى نينگ قتارلارينه يازشول اوى ايگالارى نينگ هر ذات حيوانات و هم هر يلغى قانچه غلّه ايكب و قانچه غلّه آلوشلارين و هم آلارنينگ هر قايولارى نينگ كسبلارين برگا خطلاسه بس موندين كيين شول ولوس ياكه شول بلده و قريه لار نينگ هر يلغى براجاك آقچه لارين شول دفترگا يازيلغان كسب و مال و ملك لارينه تقسيم قيلنسه امّا ينه بر خير ايش شولكيم شول اوى ايگالارى نينگ مذكور تقسيم لاريدين كيين قوللارينه يارليق بيريلسه اوزلارى نينگ تا كيلاجاك سايلاوغه چه هر يلغه قانچه دين تولاماكلارى يازولوب و هم كسب و مال و ملكلارى يازلوب امّا بناگاه بول اوچ يل اورتاسينده قايو اوياز ايلينه ياكه قايو بلده و قريه و ولوس خلقينه مال ياكه ايكينلار يورتگرليگى دوش بولسه انده شول خلقلارنينگ شول يلغى ياكه توب اولوغ يوتگرليك بولسه برنچه يلغى آلارنينگ براجاك آليم اقچه لار وقتينه و آز كوبينى قراب بتمام اوياز ياكه آرتوق راق بولسه بتمام اولوس خلقيغه تقديم قيلينسه. بس اوشبو عرضيمز سيز كرامى القدرنينگ حضور عالينگزگا معقول بولسه اوز توغرونگزدان قايو بر يتوشلى اورون لار واسيطه سى و قايو بر مجالس مصلحتلارى برلان و هم مونينگ قايو بر كملارى بولسه اوزينگز قوشوب اوشبو بولاجاك سايلاوغه جارى قيل سانگز فقير مسكين لارگا كوب اولوغ مرحمتنگزدان بولار ايردى ديودايم اوزاق عمر اولوغ دولت و سلامت ليكينگزنى تيلاب يازغوچى كمينه معلومينگز عوض محمد ميرزا اوميد مرحوم اوغلى.

27 نچى اوكتابر 1886 نچى يلنده.