Zerrspiegel [ Search ] [ Index ] [ Edit ] [ About ]

Стих об Андижанском ишане. اوشبو زمانمزداغى عامى ايشان لار حصوصيده بر شاعرنينك يازكان شعرى

Description

Cтихотворение Султан Ахмада, посвященное критике Дукчи-ишана – предводителя Андижанского восстания 1898 г.(Туркистон вилоятининг газети. 1911, №82))

Categories

Андижан Военное дело Восточные слова Географические названия Город и архитектура Дукчи ишан Ишан Казах Мечеть Минг-типа Религия Султан Ахмадхан ишан Чимкент Чудотворство Шайтан Шариат Шейх Этнические и племенные группы

Editor

AE, MB

Text

اوشبو زمانمزداغى عامى ايشان لار

بر شاعرنينك يازكان شعرى

اوشبو كونلارده كوپايمش عام ايشان بچه غر

اعتقاد ايتمش انكا بر نيچه نادان بچه غر

عاميلار صيدى اچون يلغان كرامت ايلابان

بر پوچك پلغه ساتار ايمانين ارزان بچه غر

عامى ايشان بر ايشكدور بو ايشك دين كم ايرور

بو ايشك نى تانيماى اخلاص قيلغان بچه غر

عامى ايشان كيم ترور ايتاى سزه ماهتين

ذكرى حقنى دنيا اچون دام قيلغان بچه غر

بى توكل بى قناعت بى ديانت بى ادب

حرص شهوت كبر نخوت حيله غه كان بچه غر

ديدى حضرت جيفه دور دنيا طلا بى كلاب

كم دور ايت دين جيفه اوچون شيخ بولغان بچه غر

خلق برتن دور بو تن غه عامى ايشاندور مرض

بو مرض نينك بعضى سى دور دوكچى ايشان بچه غر

بو مرض چون بولدى پيدا اندجان ملكى ارا

نيچه لارنينك خانمانين قيلدى ويران بچه غر

اندجان ملكى ارا مينك تيپه دين ايلاب ظهور

ايلادى مينك تيپه نى ير برله يكسان بچه غر

لايصح لزهد ديديلار مع الجهل اهل شرع

حق طلب بولسنك اوقوغيل نامسلمان بچه غر

جهل عورت علم ايشتان فى المثل دستار زهد

كيكوچه دستار بزرك كيكيل ايشتان بچه غر

عهد قيلدينك پرينك آلديده كنه قيلما سليكا

برچه قيلغانينك كنه اى عهد يلغان بچه غر

اوقوغاى اوراد يوز لحن خطا برلان مدام

مسجد ايچره نعره تارتيب آلغالى نان بچه غر

هفته ده بر كون بو كورمكنى بيلور اوزيكه فرض

فرضدين سورسنك بولور البته حيران بچه غر

توشمسه بولغاى كوتين تيككان تونكغوزديك درغضب

بولغاى ايشان بولغانيغه كوب پشيمان بچه غر

ايل قاشيده نعره تارتيب ايلاكاى ذكر آشكار

حق اوچون هيچ برده قيلمس ذكر پنهان بچه غر

روز شب يوقدور يمك ايچمك دين اوزكا مقصدى

اوشبو باعث دين سمورميش مثل حيوان بچه غر

اندكى بولسه رياضت ياكى خوف آخرت

بولمس ايردى مونچه فربه بوينى يوغان بچه غر

قيلمغاى اعزاز اهل علم كرچه فرضدور

همچنان كيم قيلمدى آدم غه شيطان بچه غر

ايل كوزيغه كورونورغه ظاهراً كول ولندى

ليك خلوتده ايرور عيار چقان بچه غر

انجمن ده اولتورادور كوز يوموب بوينين ايكيب

كربه ينكليغ سچراكاى كركورسه سچقان بچه غر

ايل قوليغه كوزينى تيكماقدين اوزكا كسبى يوق

كور شل ينكليغ وجودى ايلكا تاوان بچه غر

بى قناعت دور ايكاسز ايتديك ايل كزماق ايشى

بول كوپك نفسى اوچون صحراده سرسان بچه غر

كيتمكاى هركز قزاق لار آوليدين ايلانيب

اونغونچه يا اولاق يا قاف ارقان بچه غر

اوتقوزور بر ماچه خرنى آلديغه جين اوردى ديب

اول جين اورغانغه سالور دم بو جين اورغان بچه غر

زيب زينت برميش اوزيغه حرير تونلار كيب

سرمه برله غازه قويميش مثل نسوان بچه غر

بولسه برچه سين كبى بى كسب طماع فقط

بولغاى ايردى لحظه ده بو دهر ويران بچه غر

حيف كيم بيلمس عوام سرين الارنينك يوق ايسه

تقصير ايشان اورنيغه دير ايردى ايشان بچه غر

بيرمس ايردى نذر انكا عامى و بى عقل لار

ترك ايتاردى رسم ايشان ليغ نى آلان بچه غر

بد متاعى كاسدى كا ايل خريدار اولمسه

قورمس ايردى اولا بو نوع دوكان بچه غر

اوتوز ايكى بچه غر ديكان غه كيلسه اچيغى

ايتامن منك بچه غر مليان مليان بچه غر

بلدنكز مونى سبب دين مسجد ايچره تولغوسى

پاى كوبان دست افشان دنبه جنبان بچه غر

بارك الله جانور زهنينكنى قوى جا بليه ديب

اويناتور ميمون كبى ايشان شيطان بچه غر

چمكند ليك سلطان احمد خان ايشان مرحوم نينك عامى ايشان لار حقيده يازكان شعرلارى تذكرة الخاطر يازيلدى

تركستان ولايتى نينك كزيتى( 1911, №82)