Zerrspiegel [ Search ] [ Index ] [ Edit ] [ About ]

Стихотворение посвященное критике Дукчи-ишана – предводителя Андижанского восстания 1898 г. (усл., аноним, № 3)

Description

Третое анонимное стихотворение(Государственный архив Республики Узбекистан, №1009, Личный фонд Н. Остроумова, опись №1, дело №109, лист 26а).

Categories

Андижан Афганец Бог Военное дело Восточные слова Географические названия Город и архитектура Еврей Европеец Жилище и утварь Знамя Зубная щетка Иблис Индус Ислам История Йикчи Йикчи ишан Кади Казань Кизилбаш Конфессиональные группы Копье Котел Культура Машина Минарет Минг-типа Молитва Муджтахид Мулла Мултук Мятеж Наиб Начальник Обитель Оценка Падишах Политика Помощник Право и судопроизводство Пророк Профессиональные группы Религия Ружье Русские слова Русский Самооценка Сатана Солдат Султан Суфи Тарикат Таш куприк Фергана Фонарь Хаким Ханака Царь Четки Шайтан Шайх Санъан Шариат Шейх Шиит Этнические и племенные группы Янги шахар توغ قيليج ملتيغ

Editor

AE, MB

Text

چيقيب مينك تپه دين بر عامى ايشك ييكچى ايشانى

فساد خلق اوچون توغدى مكر اول بولدى شيطانى

بريب بريب بر نيچه ايلكا آش ُ نان تسخير خلق ايلاب

كمان ايلاب خلايق غوث ايرور يا شيخ صنعانى

ايكان اول نابكار فتنه جو مكار ريوانكيز

كسافت داميغه ايلدى نيچه عامى ُ ملانى

قيليب آغاز بى معنى طريقت يوليغه يعنى

اوزين شيخ زمان ايلاب قيليب بيهوده دعوانى

بريب بر نيچه يل اول آشُ نان صيد خلايق دين

دليده يوق ايكان ياد خدا مرضاى سبحانى

قويوب آشخانه سين تام استيغه اوتنى نهان ايلاب

فنارُ ماشنه ديكان ايكان ايل ترفه نادانى

پيشوروب آشينى سرعت بيله اول ترفة العين

كرامت انكلاتيب ايل بيلمايين مكار رسوانى

قزانين كوركان لر بر نيچه سين بار خزان ايتى

قولين توتقان كيشى لار بولديلار ير بيله يكسانى

همه بارغان كيشيكا كورساتوردى شيوه رنكارنك

تكلف برله مطبخ خانه سيده قيلدى مهمانى

ساليب ايل الديغه دسترخانين مله تون برله

آليب بر قوليغه توزنى قوليده نانُ حلوانى

مكر كيچه قايدين آش نان ييدى زهر زقوم اولدى

انينك بر دانيغه كوياكه چيقتى آنى مينك جانى

ايشيتيم خانقاهين يانيده طرفه منار ايتميش

تكيدور خام اوستى خشت پخته كور منارانى

غرض معراج ايدى يا اوشبودين سيرى توقوز افلاك

تصرف ايلاديم سفلينى ديب قصد ايتسه عليانى

بو اندين هم تعجب سورسه لار مردم تا مريدين

جوابى چاه قازديم يانيغه آلغاى تامور آنى

ينه اوز لفظيدين تأريخ موندين هم تعجب راق

بشارت سيد كونين دين ديب قيلدى انشانى

بشارتليك منارى سهل كونده واژكون بولدى

تكيده قالدى ايرلار صوفى لار هم نيچه صبيانى

قاليب ميز برچه ميز غافل اوشال مكار مكريدين

تغافل كا ساليب ايل نى كرامت كورساتيب آنى

تمامى كارُ بارى برچه ريوُ رنكُ قلابى

جهانده آدم اوغلى كورمدى انداغ هنردانى

مكر ابليس ايديمو يا فرنكُ يا قزيل باش

فدا قيلدى مكر قصد مسلمانلار اوچون جانى

مسلمان بولسه ايردى مجتهد قولين توتار ايردى

ادايى دين ايتاردى مصلحت كر بيلسه عقبى نى

ايشتيم قرض آليب ايلنى پُلين برماى هزاران صوم

جهودُ هنديىُ هم باى لار بزاز افغانى

همه پُلدارلار حسرت ندامت برله قالديلار

كيمه ايتورنى بيلماى درد ايچيده بولدى حيرانى

نچوك كيم ملكُ اشياسى تمامى پادشاه ليكدور

مكر اول شوم نا انصاف دوزخ قيلدى مأوانى

منكا جزم اولدى اوشبو بدكهر حالى منافقدور

خلاف وعدهُ يلغان ايروردى عهد پيمانى

همه لشكرلاريغه بردى بر مسواكُ تسبيحى

الارغه اسماندين توغ توشوبدور ديدى يلغانى

مسواكينك ملتيغينكُ نيزه تسبيحينك قيليجينك ديب

قيليب تحريص اوشبو مكر برله نيچه نادانى

توشوب ايل الغرض ناچار اولوب سرعت بيلان كيلدى

شباخون اوردىُ صلاتلاركا سالدى غوغانى

تافيب برمونچه غفلت برله ياتقان آزاد روسلارنى

ياريب قارنين قراغلاب مثله ايلاب قيلدى يغمانى

قچان اوشبو تمثل بار ايميش حكم شريعت ده

بيلينك بو اهل سنت دين ايماس بوزدى مسلمانى

مكر قصدى مسلمانلارغه بو خونريزليك سالغاى

بوزولغاى راه رسمى ايلاكاى تنبيه سلطانى

غرض بو فتنه نى سالغاى اوزى باشينى قوتقارغاى

جهانغه اوت توتاشقاى تا بوزولغاى دين اديانى

اكر بو نابكار شيعه بدكردار ايماس بولسه

نچوكدين عالمان دهردين سورماس بو فتوانى

خدا اوردى جميع انبيا و چهاريارلارهم

عزيزلار اوليا لار مجتهدلار غوث ربانى

تورالماى قاچتى ينكى شهردين قوغون يكان ايت ديك

ايزيدين قولادى حاكم توره چون شير غرانى

قاچيب اول چيكه لاب سرعت بيلان دريا بويين كوزلاب

شاشيلكان تولكى ديك دريادين اوتى نا مسلمانى

قاليب ميز بى خبر اوشبو كسافت ماجراسيدين

و كرنه بيلساك ايردوك قويماس ايردوك اوشبو رسوانى

خدا انينك التفاتى نيچه حاكم برله نايب لار

شهرنى كورديلار كيم هيچكيم بيلماس بو غوغانى

همه اوز حاليغه كسب ُ تجارت برله مشغول دور

و كرنه حاليميزغه ييغلار ايردى يتى ايوانى

آلهى بهره ور قيلغيل هميشه عزّ دولت دين

بيلينى باغلاسون قادرقلى نى شير يزدانى

اول ايشان شوملوغى بو اندجان اهلين خجل ايلاب

عجايب شرمسار ايتى همه قاضى دملانى

خبر تابتى شهرنى بولغالاب ييكچى ايشك قاچميش

بويوردى هر طرفكا آدمى چابك سوارانى

كيراك اسلام ايلى دايم دعاى جانينى قيلسك

بو ايرنى سايه سيده اندجان كورماس پريشانى

سوراغلاب پست ُ بالا تاغ چولنى اول دل آورلار

توتوب تاش كوفروكيدين باغلاديلار زارُ افغانى

اكر بو فتنه آخر زمان نى توتماسه ايردى

انى شرى فساد اندود ايتاردى روى دنيانى

محب زينهار مجهول نسب لاركا كونكل برمه

مريضى جُرمينكا قيلغيل شريعت دين مداوانى