Zerrspiegel [ Search ] [ Index ] [ Edit ] [ About ]

Стихотворение посвященное критике Дукчи-ишана – предводителя Андижанского восстания 1898 г. поэта Хваджа Сабири(усл.)

Description

Баяз-и Хваджа Сабири. Институт востоковедения академии наук Республики Узбекистан, литография №11087, издательство литографий Г.Х. Арифджанова, Ташкент, без года издания, 11-15.

Categories

Андижан Военное дело Войско Восстание Восточные слова Географические названия Губернатор Жилище и утварь Ислам История Ишан Кари Культура Минг-типа Мулла Мюрид Мятеж Обычаи и обряды Оценка Политика Порок Религия Русские слова Сайид Самооценка Сибирь Солдат Фергана Шейх قاری پارسا

Editor

AE

Text

دوران چرخ ايدل بيحد يمان ايمسمو

طوفان غصه و غم حددين آشکان ايمسمو

کردُ غبار فتنه تا آسمان ايمسمو

اسلام اهلی غمدين رنکی سمان ايمسمو

بو شورش عجائب آخر زمان ايمسمو (۱۱/۱۲)

سادات پيشوالر هم شيخ رهنمالر

اولاد اتقيالر علم اهل هم رسالر

قاری خوش ادالار اهل دل دعالار

اصحاب فضل دانش هم خيل پارسالار

ملای درس خوانلار کوب بی نوا ايمسمو

هر برلاريغه يوز غم دوران پرجفادين

کونکل لاری مشوش بو آفت سمادين

هر لحضه قوتولمای خوف غم و بلادين

خونابه لار يوتارلار بو درد بی دوادين

فسق فجورغه تولکان روی جهان ايمسمو

فاش اولدی فسق عصيان هر شهر و هر قرياده

فرغانه ده يورادور ايرکاک لار ايله ماده

ناکس بولوب سواره سادات دور پياده

بر نيچه قيز حرامی توغدی حرامزاده

فرغانه نی زمينی دار الامان ايمسمو

بو عصر افتيدين چيقتی فساد اغوا

مينک تيفه ليک ايشاندين کوب شور بولدی پيدا

بولدی خيال فاسد بر کيچه سی قضارا

مردم غه سالدی فتنه اول غول ديوآسا

ای اهل عقل انصاف بزغه زيان ايمسمو (۱۲/۱۳)

تا قوردی دام تذوير اول نفع جوی بدخو

مردم دن آلدی اقچه مکر ايله قيلدی جادو

کوب خلق نی چيقاردی بولدی قيليب هياهو

ظاهرغه ايردی ايشان باطن غه خنک بدبو

بو نوع مکر و حيله از بهر نان ايمسمو

فرغانه غه ايشانلار ديدی ايمسمن ايشان

تانيب مريدلاريدين اويی غه قالدی حيران

هر کيمکه ايردی آشنا ايشانغه بولدی سرسان

کيتی اويی نى تشلاب هر ساريغه کريزان

تانغان ايشانليغيدين جمله ايشان ايمسمو

هر کيم مريدی ايردی غمکين و زار اولدی

کلديک آچيلغان ايردی غم آفتيغه سولدی

نيچه کشيلار اويی آخر خراب بولدی

منصب دار ايردی هر کيم يموغه اول قوتولدی

منصب دار اهلی کورکيل شاد و خندان ايمسمو

بو فتنه لارغه باعث مينک تيفه ايشانی

اوت سيز پيشور طعامی بو دورانی نشانی

کرامت ديب ييغيلدی آدم لاری مكانى

ماشينه دين قزانی يوقدور مريدنی سانی

مينک تيفه نی ايشانی مله چفان ايمسمو (۱۳/۱۴)

بير کيچه قيلدی غوغا مردمغه سالدی غوغا

شيطان فريفته قيلدی اسرار بولدی افشا

ديدی کيلينک مريدلار سيز اولدورونک نصارا

آخر بو فکر ايله عالمغه بولدی رسوا

شيطان سوزى آليبان سرسان بوکان ايمسمو

دنيا فريفته قيلدی کوب حيله لارنی قيلدی

مينک تيفه ليک کيشی لار ياپريمديب يقيلدی

عسکرنی تيغ قدای عضالارينی تيلدی

عقل بار آدم آخر ديوانه لار بيلدی

انکا مريد بولکان سبير کيتکان ايمسمو

بو فتنه لارنی ايلاب کوزدين يوقالدی غايب

اول فتنه کرنی فکرى چون ايردی غير صائب

قالدی بلا و غم غه هر چند بولدی تائب

انديجان نی حاکمی کوبورناطورغه نايب

صلات عسکر ايله اوشلاب کيلکان ايمسمو

شيطان جين سوزيغه ايشان که چندی بولدی

عسکر قوليغه ناکاه بند لوندى بولدی

اوشبو بلاغه باعث اول کندی شخص بولدی

تقديرغه بريب تن عسکرغه بندی بولدی

انديجانغه کيلتوروب دارغه اسغان ايمسمو (۱۴/۱۵)

نيچه مريدی ايله اسيلدی دارغه بی شک

دار اوستيغه اولوبان احوال بولدی چون سک

کوردی انی کوز ايله يوز مينک کيشی نيچه لک

دارنی تکيغه ايردی قارغوچوتور اهک

داردن اهك توشتى کويوب يانکان ايمسمو

حاجی صابر آخر ديدی بو ينکليغ اشعار

قيلدی محمس ايچره ايشان ايشينی اظهار

آزغه در دست ايرمس کوب ايله قيلسه بيکار

شايدکه بولسه پنديم آزاده لارغه يادکار

بيهوده ايش نی قيلغان دوکچی ايشان ايمسمو

“بياض حاجی صابری” دن