Zerrspiegel [ Search ] [ Index ] [ Edit ] [ About ]

Стихотворение Надим Намангани (1844-1910), посвященное критике Дукчи-ишана - предводителя Андижанского восстания 1898 г.(усл., n°5)

Description

مرغنان اويازديغه طابع مينک تپه غه مکر قزانينی قورغان

اوزی بداصل ييکچی خليفه نی هجوی اوشبودور

(Институт востоковедения академии наук Республики Узбекистан, фонд №1, № 9365, лист 1).

Categories

Администрация Ашура Военное дело Война Восточные слова Географические названия Жилище и утварь Знамя История Ишан Йикчи халифа Казань Кизилбаш Киргиз Конфессиональные группы Котел Культура Мазхаб Маргилан Минг-типа Мухаммад Али Мухаррам Надим Намангани Обычаи и обряды Оценка Падишах Перс Пир Политика Право и судопроизводство Религия Самооценка Уезд Царь Чудотворство Шайтан Шариат Шиит Этнические и племенные группы اوروش

Editor

AE, MB

Text

اوياز مرغنانُ مينک تپه دين

بناکه چقتی بر مکَّار رنکين

انی قيلميش ايشی ييکچی ليک ايرکان

اتام چميانليک ايردی ديرميش ايرکان

ينه ديوارکش ليک صنعتينی

قيلوب تابوب ير ايرکان قسمتی نی

انکا ييکچی خليفه ليک لقب دور

ولی بداصلُ مجهول النسب دور

نيچوککيم بيلمادوک آتا باباسين

ينه بيلمس کيشی عمه طغاسين

حماقت بابيده يکتا ايکان اول

جهالت ايچره بی همتا ايکان اول

خلايق ايلابان تفتيش آنی

بولک مذهبده ايرکان ديرلار آنی

اوزی جنی ايکان پرسيان هم

تافيلمس اصليدين نام و نشانهم

قرا ساچُ قره قاش آلمه باش دور

ديسام کر پرسيان ديمه اداشدور

اوزی عامیُ جاهل ليک ايشان

کرامت لاری آنی باری يلغان

چنانچه منظر اوزره داش قوروبدور

حقيقت ده تيشوکد ين اوت يوروبدور

خلايق آنی بی اوت پيشتی ديرلار

عزيز مهمانلار ييشتی ديرلار

آتی محمد علی دور اول قزيلباش

عجب شهرت چيقاردی اول بريب آش

انی ايشان ليکی دور آشُ نانی

ييغيلدی انده آدم لار يمانی

بلی نادانُ جاهل لار يغيلسه

الارغه مُفت آش نان تافيلسه

اسير نفس بولغان مرد نادان

ديمه آدم ايرور اول بلکه شيطان

خلايق آش نانيدين گپورغای

شيلانی نی کرامت ديب يوکورغای

ديکايلار پيريميز سيز پشواميز

نه يرغه باشلاسنکيز بارغوميز بز

دماغيغه بو طغيان اول ايشکنی

اوروش قيلماق نی سالسه قيلمه شکنی

يمان بداصل قيرغيزلار يغيلغاچ

يوکورکای قوی ساری ايت بولسه کر آچ

قزيل باشلار محرّم آيی بولغاچ

اُونوجی کون نی عاشورا دييلغاچ

محرّم آييده غوغا توزارلار

الار کوکسيغه اولکون تاش اورارلار

محرّم آييده اول ايت قوتوردی

يراق قه جنی لار برلان يوکوردی

قوتورغان ايت کبی دارغه اسيلدی

اننک بَيراقلاری اوتغه ياقيلدی

نيچوککيم بيلمس اول بد بخت اصلا

شريعت ده درست ايرمس بو غوغا

اطاعت فرض واجب پادشاغه

ديسم حق دور سوزوم کيتمس خطاغه

نيچوککيم پادشاه عالم آرا

تافيلمس عصريده بر ظلم اصلا

همه اهل جهان ممنون و مسرور

جهان آباد و عالم بولدی معمور

نشاط و عيش ايله شادان و خندان

جهان اهلی نه ينکليغ تافتی احسان

موننک ديک عصرُ اول نادان جاهل

يمان ايش قيلدی اما خلق غافل

خيال و عقل دين اوتمسدی اصلا

مونينکديک بی ادبليک بولسه برپا

مونينکديک بی ادب ليک قيلسه بنده

جزا تاتقوسی دور ايکی جهانده