Zerrspiegel [ Search ] [ Index ] [ Edit ] [ About ]

اشعار راجی مرغنانی

Description

Стихотворение Раджи Маргинани (1834-1918), посвященное критике Дукчи-ишана – предводителя Андижанского восстания 1898 г.

Институт востоковедения академии наук Республики Узбекистан, фонд №1, № 5868, 18a-21a; Marg’inoniy M.G’. Dukchi eshon harakatining badiiy tadqiqi // Guliston, 1994, № 5, 57-59.

Categories

Военное дело Война Волнение Восточные слова Географические названия Город и архитектура Дракон Еврей Жилище и утварь Зубная щетка Император История Иудей Ишан Киргиз Конфессиональные группы Кот-Мышь Культура Лев Минарет Минг-типа Мусульманин Мусульманское образование Нация Обычаи и обряды Оружие Оценка Падишах Перс Пир Политика Правительство Право и судопроизводство Раджи Маргилани Религия Россия Русские слова Самооценка Сокол-Сава Солдат Султан Суфи Турок Узбек Фауна Фергана Фронт Христианин Шайтан Шариат Шах Шейх Шугнан Этнические и племенные группы ايچکو- بورى بورکوت- تولکی تورت مينک صالدات قوشون

Editor

AE, MB

Text

( a18) ايردی فرغانه ملکی دامانه

گاه آباد گاه ويرانه

ايردی صحراسی برله امساری

سلطنت نی نظاميدين عاری

دشت صحراسی اوزبک ُ قيرغيز

بعضی سی يخشی بعضی شورانگيز

اوتديلار موندا هر نچوک جانلار

آز زمان ايچره قنچه سلطانلار

ايردی آزرده فرقهء اشراف

غلوه دين خالی بولمغاچ اطراف

بولدی روسيه مملکت داری

حکمی فرغانه اهلی غه جاری

شرع اورنيده حرمتی برلان

هر کيم اوز دينُ ملتی برلان

دُنْيَوی منفعت مسلمانلار

کوردی تجار خيلی دهقانلار

قيلديلار کوب يقين اوزاق يولنی

قالمادی وهم دشت ايله چولنی

همه نی حاليدين اوزی آکاه

برنی ايلار کدا براونی شاه (a18/b18)

بيلادور اول حکيم حکمت نی

بردی روسيه غه بو دولت نی

بولدی بزلارغه مرحمت گُستر

ايمپراطور اعظم و اکبر

دوريده نفعی ايلغه عام اولدی

سلطنت امری بانظام اولدی

باز ايله صعوه بر چناق اولدی

قوی ايله بوری هم قوناق اولدی

لطفی هر فرقه لارغه تينک اولدی

دولتی باره باره کينک اولدی

توتدی صدا ايله حکمی فرمانی

اوزبک ُ ترک فرس عبرانی

شمع اشفاقی چون منوردور

رأفتی عامه غه برابردور

کيم بو دولت غه بولسه بد پيشه

نخل عمريغه اورغوسی تيشه

حق ياروتکان چراغ اوچمايدور

بيخی محکم درخت کوچمايدور

عدل شاه قيلسه ملکنی آباد

اولسون اول کيمسه اولمسه منقاد

آته سی ييکچی اصلی شغناندين

اينه سی ايمچی کاتته بولغاندين

نيچه مدت اوييده ييک قيلدی

گه سُمک قيلدی گه بيشيک قيلدی (b18/a19)

تاشلادی ييک ساتورنی کمپيرغه

باردی ايشان بولورغه بر پيرغه

همه صنعت غه بولدی اول عامل

پاخسه ديوارغه جوده کامل

اوزينی شيخ ژنده ليک قيلدی

ظاهری يخشی بنده ليک قيلدی

ظاهری ايل کوزيغه کوب يخشی

علمالار ديوردی کوز بخشی

کورونوردی خوب ايل کا يومشايکان

ايسکی طون ايسکی سله شومشايکان

چيقدی مينک تيفه نی کناريغه

جا قيليب ايلنی رهگزاريغه

سيپتی چيرتمککا دان توزاق قيلدی

آونی انديشه سين اوزاق قيلدی

ترکُ قيرغيزنی آلدی خوب تاولاب

بردی هر کيمکا کونکلنی آولاب

باغلادی بيلنی کاتته همتکا

توردی هر کيمسه بارسه خذمتکا

خيلی مهمان غه آچدی دروازه

بولدی ايلغه بلند آوازه

قوی سويوب گوشتينی بوتون بردی

يخشی مهمانغه يخشی طون بردی

مکر شيطان يوليدين آزدوردی

تيلبه بولدی ُ ديو يازدوردی (a19/b19)

گرد باد جنون اوراب آلدی

ايتاگين جن توتوب بوراب آلدی

باشلادی آنی يوز هوالارغه

قالدی بيهوده ماجرالارغه

خام خشت برله نردبان قيلدی

کوييا عزم آسمان قيلدی

خواه لادی ايرماغماقنی بالاغه

باشلاسه غلوه نی مسيحاغه

نردبانی يقيلدی بتماسدين

قالدی حسرتده کوککا يتماسدين

اوخلادی خلقه ايچره توش کوردی

اويقوده مملکتنی بوش کوردی

قولغه آليب عصای موسی نی

قولاماق بولدی قوم عيسی نی

شيخ عامی غه ديودور حامی

انی روياسيده يوق الهامی

فيض بزلارده فتح نصرت ديب

غيب دين بولدی بو بشارت ديب

آلدی غه سالدی نيچه صوفيدين

جمعی احمق ايلينی توپيدين

قنچه مسواک کوب تراغ بردی

ييک يغاچدين يساب يراغ بردی

کيلدی بعضی پياده لوقللاب

چرچکان آتده بعضی دوقللاب (b19/a20)

بوری توننی يوزی قرارغانده

يتی خاکانغه تانک بوزارغانده

ديدی صالدات خيلين اوشلارميز

اوخلاتوب تورموقينی تيشلارميز

ييک يغاچ بردی هر بر احمقغه

قصدی صالداتلارغه سوقماقغه

کورکه روسيه خلقی ايرمکمو

ييک سانچورکا ايسکی چرمکمو

ديدی بزلارکا اوق آتالمسدين

قاچادور اورنيده يتالمسدين

کامل القهر قوم عيسى غه

تيکدی غرق اولدی کاتته درياغه

بيلمادی دولتی مؤبدنی

قينادی امت محمدنی

بيلدی سالدات اورنيدين توردی

تورت مينکی نی قولادی سوردی

صبح وقتيده توردی قتيغ باد

قيلدی ايشکاب تاپارنی بی بنياد

بولدی بيهوش جنی ايشانی

قول اياغينی کيتدی درمانی

باشيده مَلَّه اوستيده ژنده

بولدی قيلغان ايشيغه شرمنده

قوشونی اول زمان قاچيب کيتدی

فتنه توفراغينی ساچيب کيتدی (a20/b20)

کوب مسلمان لار آت چاپيشتيلار

قاچکانين آختاريب تاپيشتيلار

بعضی سی اولدی ضرب کلتک غه

ييکچی ايشانی چيقتی غلتکغه

اهل افساد دارغه آسيلدی

لله الحمد فتنه باسيلدی

فتنه باسيلدیُ چنکی کيتمايدور

بو کدورت نينک زنکی کيتمايدور

يانکان اوت اورتاسيده اول ناگاه

تاشلادی اوزنی ديب خليل الله

باشقه لار هم بو اوتده قاورولدی

کولی هر مملکتکا ساورولدی

بو قرا ايشنی اول يمان قيلدی

آق کونکل لارغه کوب زيان قيلدی

باش کوتارکان نی يرکا خم قيلدی

شرم دين جبهه ميزنی نم قيلدی

بو يمانلار ايشيغه مضطرميز

فتنه نی جنگيدين مکدرميز

شاه اعظم نی لطفيدور دريا

چرک دريا سوييده ناپيدا

حق آلان لارنی يارمند ايتسون

سرنگون لارنی سربلند ايتسون

عبرت اهليغه کوب نصيحت بار

عاقل آدم غه آنکلاماک درکار

هيچکيم شيرغه تيکالمايدور

تيکسه هم پنجه سين ايگالمايدور(b20/a21)

ايشانوب ايچکولارنی زوريغه

اورادور اوزنی زور بوريغه

اوزنی عاقل اورارمو خنجرغه

تيکسه بولغايمو ياتکان اژدرغه

زور سرپنچه يوقمو بورکوتده

اولدورور تولکی لارنی بر پوتده

ايتونک البته خيل سچقان غه

کُربه کورکانده چيقمه ميدانغه

بارمو چومچوقنی چيقماگان جانی

گر قوروق چی نی کورسه ساپقانی

مور پر قيلسه بولسه بالا سير

ييم قيلور آنی هر قنات ليک طير

قرغه اوزينی قرچيغای دی دور

لاف بيهوده کاتته بوخ يی دور